Ծրագրին դիմելու կարգ

1. Ընդհանուր դրույթներ

1.1. «Արվեստ23» ՀԿ-ն (այսուհետ՝ «Արվեստ23») մեկնարկում է «Ծնվել եմ Արցախում» կրթական ծրագիր (այսուհետ՝ Ծրագիր) Արցախում ծնված և Արցախից տեղահանված մինչև 18տ. տաղանդավոր պատանի երաժիշտների համար հետևյալ մասնագիտություններով՝ ջութակ, ալտ, թավջութակ, ֆլեյտա, հոբոյ, կլարնետ, ֆագոտ, գալարափող, շեփոր, տրոմբոն, հարվածային գործիքներ (ոչ ազգային նվագարաններ), դաշնամուր և տավիղ:

​

1․2․ Դիմորդները ընդգրկվելու են Ծրագրում մրցութային սկզբունքներով և հաղթահարելով մրցութային փուլերը՝ համարվելու են Ծրագրի շահառուներ (այսուհետ՝ Շահառու)։ Վերջիններիս համար «Արվեստ23»-ն ապահովելու է․

• Վարպետության դասեր

• Բեմական փորձ 

• Թանգարանային այցեր

• Օտար լեզվի դասեր 

• Այցելություն Հայաստանի պետական սիմֆոնիկ նվագախմբի կազմակերպած հայաստանյան համերգներին  

• Ֆինանսական աջակցություն՝ ուսման վարձավճարի կամ մասնագիտական այլ ծախսերի համար 

• Երաժշտական գործիքի տրամադրում` ըստ անհրաժեշտության (կախված դիմորդի՝գործիքի առկայությունից և բնակության վայրից)

• Համակարգչի և ինտերնետ կապի տրամադրում՝ ըստ անհրաժեշտության (կախված դիմորդի բնակության վայրից)։

 

1.3. Մրցութային փուլերի ավարտից հետո «Արվեստ23»-ը կարող է ընդգրկել Ծրագրում առավելագույնը 23 Շահառու։ Շահառուն ընդգրկվելու է Ծրագրում 1 տարի ժամկետով:

​

2. Մրցույթի անցկացման փուլեր

 2.1. Մրցույթն ընթանում է հետևյալ փուլերով.

• դիմում-հայտի և անհրաժեշտ փաստաթղթերի ուղարկում,

• մասնակցություն ունկնդրումներին Երևան քաղաքում,

• հարցազրույց «Արվեստ23»-ի նախագահի հետ,

• արդյունքների ամփոփում և Ծրագրի շահառուների ընտրություն,

• պայմանագրերի կնքում։

 

3. Ծրագրին դիմելու նախապայմաններ

3․1․ Ծրագրին կարող են դիմել Արցախում ծնված և Արցախից տեղահանված այն պատանի երաժիշտները, որոնք․

• բնակվում են ՀՀ-ում,

• դիմում-հայտը ներկայացնելու օրվա դրությամբ մինչև 18 տարեկան են (18-ը ներառյալ),

• հանդիսանում էին Արցախի երաժշտական/արվեստի դպրոցի/քոլեջի/վարժարանի սան և տեղահանումից հետո շարունակում են իրենց երաժշտական կրթությունը ՀՀ-ի երաժշտական/արվեստի դպրոցում/քոլեջում կամ Երևանի Կոմիտասի անվան պետական կոնսերվատորիայում,

• չէին հանդիսանում Արցախի երաժշտական/արվեստի դպրոցի/քոլեջի/վարժարանի սան, բայց տեղահանումից հետո ընդունվել են ՀՀ-ի երաժշտական/արվեստի դպրոց/քոլեջ կամ Երևանի Կոմիտասի անվան պետական կոնսերվատորիա,

 

3․2․ Ծրագրին դիմելիս և հետագայում որպես Շահառու ներգրավվելու դեպքում դիմորդը կարող է անդամակցել/մասնակցել «Արվեստ23»-ի կողմից առաջարկվող Ծրագրից դուրս միայն այլ այն ծրագրերին/նախաձեռնություններին, որոնք ունեն կրթական բաղադրիչ և նպաստում են Շահառուի կրթական և զարգացման առաջընթացին:

​

3․3․ «Արվեստ23»-ի Խորհուրդը, ելնելով դիմորդի՝ այլ ծրագրերում/նախաձեռնություններին անդամակցության/մասնակցության մասին ներկայացված տվյալներից, իրավունք ունի որոշում կայացնել չընդգրկել դիմորդին Ծրագրում որպես Շահառու։

​

4. Ծրագրին դիմելու պահանջներ 

4.1. Ծրագրին դիմելու համար անհրաժեշտ է ներկայացնել․

• Դիմում-հայտ՝ լրացված դիմորդի օրինական ներկայացուցչի՝ ծնողի կամ խնամակալի (այսուհետ` Օրինական ներկայացուցիչ) / չափահաս դիմորդի կողմից առցանց՝ «Արվեստ23»-ի կայքի միջոցով. սեղմել սույն կարգի վերջում գտնվող «Դիմել ծրագրին» կոճակը, լրացնել այն համակարգչով, կցել անհրաժեշտ փաստաթղթերը, ապա սեղմել «Դիմել հիմա» կոճակը։

• Դիմորդի ծննդյան վկայականի պատճեն

• Դիմորդի անձնագրի (առկայության դեպքում) պատճեն (գլխավոր էջը, ծնողների/ծնողի մասին նշումով էջը կամ հասցեի էջր)։

• Դիմորդի լուսանկար (ցանկալի է արտիստիկ լուսանկար)

• Դիմորդի փաստացի բնակության վայրի (ոչ հաշվառման վայրի) մասին տեղեկանք:

• Տեղեկանք դիմորդի՝ ՀՀ-ի երաժշտական հաստատությունից՝ առ այն, որ նա հանդիսանում է տվյալ երաժշտական հաստատության աշակերտ/ուսանող՝ նշելով․

      - ընդունման ամսաթիվը,

      - դասարանը/կուրսը, 

      - բաժինը/մասնագիտությունը

• Դիմորդի Օրինական ներկայացուցչի /չափհաս դիմորդի դրամային բանկային հաշվի առկայության մասին տեղեկանք բանկից (ոչ քաղվածք, ոչ մնացորդ, այլ՝ դրամային բանկային հաշվի ռեկվիզիտների (հաշվեհամար, արժույթ` ՀՀ դրամ, և բանկ) մասին տեղեկանք) (այն հաշվեհամարի, որին դիմորդի՝ Ծրագրի Շահառու դառնալու դեպքում կփոխանցվի ֆինանսական աջակցությունը):

 

4․2․ Դիմելուց հետո էկրանին կերևա Ծրագրին դիմելու մասին հաղորդագրություն:

 

4․3․ «Դիմել հիմա» կոճակը սեղմելուց հետո հնարավոր չի լինի կատարել փոփոխություններ ներկայացված փաստաթղթերում, ուստի նախքան դիմելը համոզված եղեք, որ հայտը ճիշտ և ամբողջական է լրացված, և բոլոր փաստաթղթերն առկա են։

​

4․4․ «Արվեստ23»-ը, ելնելով դիմորդի ներկայացրած տվյալներից, իրավունք ունի ըստ անհրաժեշտության դիմորդից պահանջել այլ փաստաթղթեր ևս։

​

4.5. Դիմում-հայտի և պահանջվող մյուս փաստաթղթերի՝ առցանց կամ էլ․ փոստով ուղարկելը համարժեք է դիմորդի Օրինական ներկայացուցչի / չափահաս դիմորդի ստորագրությանը և վկայում է, որ Օրինական ներկայացուցիչը և դիմորդը․

• ծանոթացել են, համաձայն են և անվերապահորեն ընդունում են սույն Կարգի բոլոր դրույթները և «Արվեստ23» ՀԿ-ի «Ծնվել եմ Արցախում» կրթական ծրագրի Շահառուների պարտականությունները,

• առանց առարկության ընդունում են ժյուրիի և «Արվեստ23»-ի Խորհրդի կողմից գրանցվելիք արդյունքները (կայացվելիք որոշումը), 

• տալիս են իրենց համաձայնությունը «Արվեստ23»-ին՝ իրենց կողմից տրամադրած անձնական տվյալների և տեղեկատվության՝ սույն Ծրագրի շրջանակներում մշակելու համար։ 

• համաձայն են, որ Ծրագրի շրջանակներում դիմորդի մասնակցությամբ արված լուսանկարները, աուդիո նյութերը և տեսանյութերը օգտագործվեն, տարածվեն և հանրայնացվեն «Արվեստ23»-իկողմից, 

• պատասխանատու են իրենց ներկայացրած տեղեկության ճշգրտության, հավաստիության և սույն Կարգում նշված պահանջներին բավարարելու համար:

 

4․6․ Ներկայացվող փաստաթղթերի թերի լինելու, ինչպես նաև սույն Կարգում նշված նախապայմաններին և պահանջներին չբավարարելու դեպքում դիմորդների հայտերը ենթակա են մերժման, ինչի մասին դիմորդները նախապես կտեղեկացվեն: 

 

5. Ժամանակացույց

5.1. Ծրագրին դիմելու համար հայտերի և փաստաթղթերի ընդունման ժամկետն է մինչև 2024թ․ հոկտեմբերի 15-ը ներառյալ:

​

5.2. Ստացված դիմում-հայտերի ամփոփումից հետո դիմորդները գրավոր կտեղեկացվեն ունկնդրումների մանրամասների մասին (անցկացման վայր և ժամ)՝  նրանց ուղարկված հրավերի տեսքով:

​

5.3. Ունկնդրումները կանցկացվեն ս./թ․ հոկտեմբերի 20-25-ն ընկած ժամանակահատվածում, որի ավարտից հետո դիմորդները գրավոր կտեղեկացվեն ժյուրիի որոշման մասին։ 

​

5.4. Հոկտեմբերի 27-30-ն ընկած ժամանակահատվածում կանցկացվի հարցազրույց «Արվեստ23»-ի նախագահի հետ: 

​

5․5․ Մինչև ս․/թ․ նոյեմբերի 5-ը կհայտարարվեն Ծրագրի Շահառուների անունները։ Հայտարարելուց հետո նրանց Օրինական ներկայացուցիչների հետ 10 աշխատանքային օրվա ընթացքում կկնքվի պայմանագիր:

​

5.6. «Արվեստ23»-ը կարող է վերանայել վերոնշյալ ժամանակացույցը՝ կախված ներկայացված հայտերի քանակից։

 

6. Ելույթի գնահատման չափորոշիչները

6.1. Գնահատման չափորոշիչներն են.

• Ընտրված ծրագրի համապատասխանությունը դիմորդի տարիքային և անհատական առանձնահատկություններին:

• Ստեղծագործության/ների կատարողական մեկնաբանության գեղարվեստական արժանիքները:

• Կատարողի տեխնիկական հմտությունների մակարդակը:

 

7. Ունկնդրումներ

7.1. Երևանում անցկացվող ունկնդրումների ժամանակ դիմորդը պետք է․

• հանդես գա իր ընտրությամբ ազատ ծրագրով (1 կամ մի քանի ստեղծագործություն), որը պետք է կատարվի անգիր և որն իր կարծիքով լավագույնս կներկայացնի իրեն՝ որպես առաջադրված թեկնածուի։ Ներկայացվող ծրագրի տևողությունը պետք է լինի առավելագույնը 15 րոպե:

• հանդես գա մենանվագ ստեղծագործության կատարումով (որպես մենակատար)։ Եթե ներկայացվող ստեղծագործությունը/ները կատարվում են նվագակցությամբ, ապա դիմորդը պետք է ինքնուրույն ապահովի նվագակցություն ունկնդրումների ընթացքում (անհնարինության դեպքում՝ «Արվեստ23»-ը կտրամադրի նվագակցող՝ կախված դիմորդի բնակության վայրից)։​

​​

7.2. Ունկնդրումներին մասնակցության ծախսերը (օր․՝ տրանսպորտային ծախսեր) հոգում է դիմորդը/Օրինական ներկայացուցիչը։

​

7․3․ Ունկնդրումների ընթացքում ժյուրին իրավունք ունի ընդհատել դիմորդին։

​

7.4. Դիմորդի՝ ունկնդրումներին ներկայանալ չկարողանալու դեպքում դիմորդը/Օրինական ներկայացուցիչն այդ մասին նախապես 1 օր առաջ պետք է ուղարկի գրավոր տեղեկացում info@arvest23.org էլ․ փոստի հասցեին։ Ունկնդրումներին մասնակցել չկարողանալու դեպքում պատանի երաժիշտը այլևս չի համարվում դիմորդ և չի կարող շարունակել իր մասնակցությունը տվյալ Ծրագրի մրցութային փուլերին։

 

8. Արդյունքների ամփոփում և շահառուների խրախուսում

8.1. Արդյունքների ամփոփումից հետո ընտրված լավագույն դիմորդների Oրինական ներկայացուցիչների / չափահաս դիմորդների հետ կնքվելու է Շահառուի աջակցության պայմանագիր 5 տարի ժամկետով։

​

8․2․ Ժյուրիի և «Արվեստ23»-ի Խորհրդի որոշումները վերջնական են և բողոքարկման ենթակա չեն։